24

تھائی لینڈ: نئے بادشاہ کی تاج پوشی کی تیاریاں، 4 ارب سے زائد خرچہ

تھائی لینڈ میں نئے بادشاہ کی تاج پوشی کی تیاریاں زور و شور سے جاری ہیں، تاج پوشی کی تیاریوں پر چار ارب روپے سے زائد کے خرچے کا تخمینہ لگایا گیا ہے۔

تفصیلات کے مطابق تھائی لینڈ میں نئے بادشاہ ماہا وجیرالونگ کی تاج پوشی کے لیے تیاریاں عروج پر ہیں، تاج پوشی تقریب کے لیے ریہرسل میں فوجی دستوں اور بینڈز نے حصہ لیا۔

جشن تاج پوشی پر مبنی تین روزہ تقریبات کا انعقاد اگلے ہفتے ہوگا، یہ جشن 4 مئی سے 6 مئی تک جاری رہے گا۔

واضح رہے کہ 66 سالہ وجیرالونگ دو برس قبل اپنے والد کی وفات کے بعد تخت نشین ہوئے تھے تاہم روایات کے مطابق نیا بادشاہ 2 سال کے سوگ کے بعد ہی اپنی تاج پوشی کی تقریب منعقد کر سکتا ہے۔

خیال رہے کہ تھائی لینڈ کے بادشاہ بھومیبول کا انتقال 14 اکتوبر 2016 میں 88 سال کی عمر میں ہوا تھا، انھوں نے 70 سال تک تھائی لینڈ پر بادشاہت کی۔

بادشاہ بھومیبول نے اپنی بادشاہت کے دوران ملک میں بڑی تبدیلیاں لائیں اور قوم کی رہنمائی ایک باپ کی طرح کی، انھیں دنیا کے سب سے طویل مدت تک حکومت کرنے والے بادشاہ ہونے کا اعزاز بھی حاصل تھا۔

اس خبر پر اپنی رائے کا اظہار کریں

اپنا تبصرہ بھیجیں